Құрметті әріптестер, оқырмандар! Қазақстан Республикасының Судьялар Одағының атынан баршаңызды келе жатқан Жаңа жыл мерекесімен құттықтаймын! Жаңа жыл — өткенге көз жүгіртіп, атқарылған істерге әділ баға беріп, болашаққа сеніммен қарайтын айрықша кезең. Бұл мереке әрқайсымызға жаңа мақсаттар айқындап, тың жоспарлар құруға, биік белестерге ұмтылуға серпін береді. Адамды ізгі ойларға жетелеп, кәсіби және рухани тұрғыда жаңаруға үндейді. Осы мерейлі сәт — отбасымызбен, жақындарымызбен бір шаңырақ астында бас қосып, татулық пен берекені нығайтуға, өзара қолдау мен түсіністікті тереңдетуге берілген мүмкіндік болып табылады. Бірлігіміз бен ынтымағымыздың арқасында қоғамдағы тұрақтылық пен тепе-теңдік сақталып, елімізде ауқымды жетістіктерге қол жеткізуге жол ашылуда. Осылайша, Жаңа жыл еліміздің тұрақтылығы мен өркендеуіне жаңа серпін беріп, қоғамымыздың дамуына маңызды үлес қосады. Өтіп бара жатқан 2025 жыл еліміз үшін мазмұны терең, маңызы зор кезең болды. Аталған жылы құқықтық реформалар жүзеге асырылып, жаңа заңнамалық бастамалар қабылданып, әділдік пен заңдылықты нығайтуға елеулі үлес қосылды. Осы үдерісте сот жүйесі де қарқынды даму мен жаңғыру кезеңін бастан өткерді. Атап айтқанда, Кассациялық сатыдағы соттың құрылуы сот төрелігінің сапасын арттырып, азаматтардың құқықтарын қорғауда және халықтың сот жүйесіне деген сенімін нығайтуда маңызды рөл атқарды. Мемлекет басшысының бастамасымен жүзеге асырылған саяси реформалар қоғамдық өмірдің барлық салаларын қамтып, оң өзгерістерге жол ашты. Құқықтық жүйені жаңғырту аясында сот және құқық қорғау органдарының тиімді әрі әділ қызметін қамтамасыз етуге бағытталған кешенді шаралар қабылданды. Сонымен қатар, экономиканың түрлі салаларындағы реформалар елдің бәсекеге қабілеттілігін арттырып, халықтың әл-ауқатын жақсартуға мүмкіндік берді. Әлеуметтік салада да — білім беру, денсаулық сақтау және еңбек құқықтарын қорғау бағытында айтарлықтай ілгерілеу байқалды. Бұл өзгерістер азаматтардың құқықтық мәдениетінің артуына да оң әсер етті. Осылайша, 2025 жыл еліміздің тұрақтылығы мен өркендеуіне бағытталған маңызды белес ретінде тарихта қалды. Алдағы 2026 жыл Қазақстан үшін жаңа мүмкіндіктер мен тың үміттер кезеңі болады деп сенеміз. Қазіргі уақытта жүзеге асырылып жатқан жаңғыртулар әрбір қазақстандықтың өмір сапасын жақсартуға және құқықтық жүйенің одан әрі дамуына бағытталған. Әрбір жаңашылдық пен бастама — еліміздің болашағын баянды етуге жасалған нық қадам. Қазақстан Республикасының Судьялар одағы сот жүйесімен бірлесе отырып, еліміздің дамуына бағытталған барлық маңызды бастамаларды қолдауды жалғастыра береді. Біз әділдік пен заңдылық қағидаттарын берік ұстанып, қоғамды тұрақты әрі әділетті дамыту жолында өз үлесімізді қоса береміз. Бұл жолда әрбіріміздің кәсіби жауапкершілігіміз бен жоғары біліктілігіміз айрықша маңызға ие. Әділдік пен заң үстемдігін қамтамасыз ету бағытында атқарылған әрбір іс қоғамдағы тыныштық пен тұрақтылықтың кепілі болары сөзсіз. Әр шешіміміз бен әрекетіміз заңды әрі әділ болған жағдайда ғана біз шын мәнінде әділетті қоғам құра аламыз. Құрметті әріптестер, қадірлі оқырмандар! Сіздерді келе жатқан Жаңа жыл мерекесімен тағы да құттықтай отырып, кәсіби қызметтеріңізге табыс, отбасыларыңызға амандық, бақыт пен береке тілеймін. Алдағы жыл әрқайсыңыз үшін жаңа мүмкіндіктер мен жарқын жетістіктерге толы болсын! Бірлігіміз бен адал еңбегіміз ортақ мақсатымыз — әділетті әрі дамыған қоғам құру жолында қызмет ететініне сенім мол. Жаңа жыл баршамызға тек жақсылық әкелсін! Еліміз үшін жаңа биіктер мен жарқын болашаққа бастайтын жыл болғай!

ҚР Судьялар одағының төрағасы Д.С. Әмір