Құрметті әріптестер! Қазақстан Республикасы Судьялар одағы атынан Сіздерді кәсіби мерекелеріңіз – Судья және сот қызметкерлері күнімен құттықтаймыз!

Бұл күн – судьялармен қатар, әділдік пен заң үстемдігін қамтамасыз ету жолында аянбай еңбек етіп келе жатқан, ел сенімін арқалаған сот жүйесінің қызметкерлері үшін ерекше маңызға ие. Судья – қоғам мен мемлекеттің тұрақтылығының кепілі, азаматтардың құқықтары мен бостандықтарын қорғаудың тірегі, ел дамуына үлес қосатын парасат иесі. Сот төрелігінің тарихы тереңде жатыр. Ата-бабаларымыз ғасырлар бойы әділдікті ту еткен дала заңдары мен билер институты арқылы ұлттың бірлігі мен тұтастығын сақтап келген. Көшпелі қоғамда өмір сүрген халқымыздың құқықтық мәдениетінде Төле би, Қазыбек би, Әйтеке би сынды ұлы тұлғалар әділет пен даналықтың белгісіне айналды. Олардың әділ шешімі мен көрегендігі, парасатты пайымы – бүгінгі сот жүйесінің рухани өзегі мен үлгі-өнегесі. Билердің «Тура биде туған жоқ, туғанды биде иман жоқ» деген қасиетті қағидасы – бүгінгі заманның судьялары үшін де темірқазықтай қағылып, кәсіби қызметтерінің басты ұстанымына айналды. Осы асыл мұраны жалғастыру – үлкен жауапкершілікпен қатар, мәртебелі міндетті жүктейді. Қазақстан тәуелсіздік алған сәттен бастап, сот жүйесі жаңа серпінді даму кезеңіне қадам басты. Ел Конституциясында сот билігінің дербестігі айқын көрсетіліп, «Сот жүйесі мен судьялардың мәртебесі туралы» Конституциялық заң қабылданды. Бұл заң еліміздің сот билігіне жоғары сенім мен жауапкершілік жүктеп, судьялар корпусына кәсіби талапты арттырды. Бүгінгі таңда сот жүйесі – демократиялық қоғамның ажырамас бөлігі, құқықтық мемлекеттің берік тірегі ретінде қалыптасты. Соттар заманауи технологиялармен жабдықталып, электронды сот төрелігі сәтті енгізілді. Процестік рәсімдер оңтайландырылып, сот отырыстарының ашықтығы мен жариялылығы қамтамасыз етілуде. Бұл – сот жүйесінің азаматтарға жақын әрі қолжетімді болуына үлкен мүмкіндік беріп отыр. Судья болу – бұл жай ғана мамандық емес, үлкен сын мен жауапкершілік болып табылады. Судьяның әрбір қабылдаған шешімі адам тағдырына, қоғамның тұрақтылығына, ел бірлігіне әсер ететіні анық. Сондықтан бұл мамандық иелерінен терең білім, адамгершілік, сабыр мен салмақтылық, әділдік пен ар тазалығы талап етіледі.

Бүгінде еліміздің судьялар корпусы осы жоғары үмітті толық ақтап келеді деп нық сеніммен айта аламыз. Судьялардың кәсіби шеберлігі, заңдылық пен әділеттілікті қорғаудағы табандылығы – қоғамның сотқа деген сенімін арттырып, ел дамуының құқықтық негізін қалыптастырып отыр.

Сондай-ақ, құқықтық мемлекеттің негізі, қоғамның әділетке деген сенімін қалыптастыратын басты тіректердің бірі – сот қызметкерлері болып табылады. Олар ел мүддесі мен азаматтардың құқығын қорғау жолындағы жауапкершілігі мол, әрі аса маңызды миссияны атқаратын тұлғалар. Олардың міндеті жоғары жауапкершілік пен кәсіби дағдыларды талап етеді.

Бүгінгі таңда Сіздердің ұқыптылықтарыңыз, тәртіпке беріктігіңіз, заңға адалдығыңыз – бүкіл сот жүйесінің беделін арттырып отыр. Елдің құқықтық мәдениетін дамыту, әділдік пен заң үстемдігін орнату жолында атқарып отырған еселі еңбектеріңіз әрдайым тиісті дәрежеде бағаланатын болады.

           Құрметті әріптестер мен сот қызметкерлері!

Сіздердің адал еңбектеріңізге, әділ шешімдеріңізге, еліміздің құқықтық мәдениетін дамытуға қосып жатқан зор үлестеріңізге ерекше алғысымызды білдіреміз. Әділ сот төрелігін жүзеге асыру жолындағы қажырлы қызметтеріңіз – Қазақстанның құқықтық мемлекет ретінде орнығуының негізгі кепілі.

Бүгінде сот жүйесінің алдында тұрған басты міндеттердің бірі – сот төрелігінің сапасын арттыру, халықтың әділетке деген сенімін нығайту, сот шешімдерінің нақтылығы мен пәрменділігін қамтамасыз ету. Бұл бағытта Судьялар одағы Сіздердің кәсіби мүдделеріңізді қорғап, біліктілікті арттыру, тәжірибе алмасу және халықаралық ынтымақтастықты дамыту бағытында жүйелі жұмыс жүргізіп келеді және жүргізе бермек. Осы айтулы күні Сіздерге және отбасыларыңызға зор денсаулық, сарқылмас күш-қуат, еңбекте толағай табыс пен бақыт тілеймін! Ел игілігі жолындағы қызметтеріңіз табысты, абыройларыңыз асқақ болсын! Әрбір қабылдаған шешімдеріңіз – әділеттіліктің айнасы, азаматтардың жүрегіне сенім ұялатар дана үкім болғай!

Кәсіби мерекелеріңіз – Судьялар және сот қызметкерлері күні құтты болсын!

ҚР Жоғарғы Сотының судьясы, ҚР Судьялар одағының төрағасы Досжан Сарманқұлұлы Әмір