Құрметті әріптестер!

Қазақстан Республикасы Судьялар одағы атынан Сіздерді кәсіби мерекелеріңіз – Судьялар және сот қызметкерлері күнімен құттықтаймын!

Бұл күн – әділдік пен заң үстемдігін қамтамасыз ету жолында қажырлы еңбек етіп келе жатқан судьялар мен сот жүйесінің барлық қызметкерлері үшін айрықша маңызға ие мереке. Сот билігі – мемлекеттің тұрақтылығы мен қоғамдағы әділеттіліктің басты кепілі. Ал судья – халық сенімін арқалаған, азаматтардың құқықтары мен бостандықтарын қорғауды өмірлік ұстанымына айналдырған биік мәртебелі тұлға.

Қазақ халқы ықылым заманнан бері әділдік пен туралықты ерекше қадірлеген. Далалық өркениеттің құқықтық негізін құраған билер институты ұлттың бірлігі мен елдің тұтастығын сақтауда өлшеусіз рөл атқарды. Төле би, Қазыбек би, Әйтеке би сынды дана тұлғалардың әділ төрелігі, кемел ойы мен парасатты шешімдері бүгінгі сот жүйесінің рухани негізіне айналды.

Халқымыз «Әділ сөз – алтын таразы» деп бекер айтпаған. Өйткені әділдік бар жерде – сенім, бірлік және тұрақтылық болады. Сондықтан сот төрелігін жүзеге асыру – үлкен жауапкершілік пен биік адамгершілікті талап ететін қасиетті міндет.

Тәуелсіздік жылдарында Қазақстанның сот жүйесі ауқымды жаңғыру кезеңінен өтті. Конституциямызда сот билігінің тәуелсіздігі нақты бекітіліп, соттардың мәртебесі мен дербестігін қамтамасыз ететін маңызды құқықтық негіздер қалыптасты. Бүгінде сот жүйесі – демократиялық қоғамның ажырамас бөлігіне, құқықтық мемлекеттің берік тірегіне айналды.

Қазіргі таңда сот төрелігін жүзеге асыру ісіне заманауи технологиялар кеңінен енгізілуде. Электронды сот жүйесінің дамуы, процестік рәсімдердің жетілдірілуі, сот отырыстарының ашықтығы мен қолжетімділігінің артуы – халықтың сотқа деген сенімін нығайтуға бағытталған маңызды қадамдар.

Судья болу – тек мамандық емес, үлкен парасат пен адалдықты талап ететін жауапты миссия. Әрбір қабылданған шешім адам тағдырына, қоғамдағы тұрақтылық пен әділеттілік қағидаттарына тікелей әсер етеді. Сондықтан судья қызметі терең білімді, жоғары мәдениетті, сабырлылықты, әділдікті және ар тазалығын талап етеді.

Бүгінде еліміздің судьялар корпусы осы биік талаптарға сай қызмет атқарып келеді. Судьялардың кәсіби біліктілігі, заңдылық пен әділдікті қорғаудағы табандылығы құқықтық мемлекеттің нығаюына және азаматтардың сотқа деген сенімінің артуына зор ықпал етуде.

Сонымен қатар сот жүйесінің үйлесімді әрі сапалы жұмыс істеуінде сот қызметкерлерінің де еңбегі орасан зор. Олар күнделікті қызмет барысында ұқыптылық пен жауапкершіліктің, тәртіп пен кәсібиліктің үлгісін көрсетіп келеді. Сот аппараты қызметкерлерінің адал еңбегі – сот жүйесінің тиімді қызмет етуінің маңызды негіздерінің бірі. Сіздердің заңға деген адалдықтарыңыз, кәсіби біліктіліктеріңіз бен ел мүддесіне деген жауапкершіліктеріңіз қоғамдағы құқықтық мәдениеттің дамуына және әділет қағидаттарының орнығуына зор үлес қосуда.

Құрметті әріптестер! Сіздердің ел игілігі жолындағы адал қызметтеріңізге, әділдік жолындағы табанды еңбектеріңізге және құқықтық мемлекет қалыптастыруға қосып отырған сүбелі үлестеріңізге ерекше ризашылығымызды білдіреміз. Бүгінде сот жүйесінің алдында тұрған маңызды міндеттердің бірі – сот төрелігінің сапасын одан әрі арттыру, халықтың әділетке деген сенімін нығайту және сот шешімдерінің тиімділігі мен әділдігін қамтамасыз ету. Бұл бағытта Қазақстан Республикасы Судьялар одағы судьялардың кәсіби құқықтары мен мүдделерін қорғау, біліктілікті арттыру, тәжірибе алмасу және халықаралық ынтымақтастықты дамыту бағытында жүйелі жұмыстарын жалғастыра береді.

Осы айтулы мерекеде Сіздерге және отбасыларыңызға зор денсаулық, мол бақыт, сарқылмас күш-қуат, кәсіби табыс пен абырой тілейміз! Ел тыныштығы мен заң үстемдігі жолындағы еңбектеріңіз әрдайым жемісті болсын! Қабылдаған әрбір шешімдеріңіз әділдіктің символына айналып, азаматтардың сотқа деген сенімін нығайта берсін! Кәсіби мерекелеріңіз – Судьялар және сот қызметкерлері күні құтты болсын!

ҚР Судьялар одағының төрағасы Д.С. Әмір